تنبيه:
“جميع الشخصيات الواردة في هذه القصة خيالية ولا تمت الى الواقع بصلة,واي تشابه في الاسماء او الشخصيات فذلك من محض الصدفة ليس الا!!”
مين بتزكر ايام التوجيهي …. مهما الواحد كبر بضل التوجيهي مرحلة من حياته ماراح ينساها …لإنها بكل سهولة السبب ب وين هوه واقف اليوم …..ما علينا… بس في لحظات هي عامل مشترك بين اكتر طلاب التوجيهي …. منها
اول مرحله بمر فيها هذا الطالب بتكون لما ييجي يختار بين العلمي والادبي و IT ….
طبعا بهاي المرحلة بتبلش تشوف اهلك …اللي بتكون ما بتشوفهم الا بالمناسبات …و بيصيروا يقولولك شو بدك تدخل يا ابني …طبعا كل الاهل بيكونوا بدهم ولادهم علمي ….وخليهم يسمعوك بتقول ادبي أو IT وشوف شو رح يصير … امك بتقولّك ولك الهامل ابن ام علي دخل علمي ..و لك حتى الهبيلة اللي كل نهاره داير بالشوارع خالد…آه خالد ابن ام خالد اللي ساكنين آخر الشارع دخل علمي …شو ناقصك انت ايد والا رجل آه…
بيجي ابوك بعديها ببلش يحكي معك بشكل موضوعي …بيقولك..يا بابا …نفترض انك دخلت IT شو بدك تشتغل!!!! …كمبيوتر …ادارة …بزنس ..ايش قوللي؟؟؟(طبعا ما راح يعطيك فرصة تجاوب وبكمل ) والا ازا دخلت ادبي شو بدك تشتغل مدرس والا مرشد والا تدبير منزلي و رعاية طفل …. بعدين بيقولك فكر بالموضوع وبسحب حاله وبروح….
وبتبلش انت تفكر و تفكر ….و بعدين بتروحله …بتلاقي مبسوط و على محياه علامات الارتياح والاطمئنان ….. فبتروح انت قايلّه بابا بدي IT ….
بحوم الصمت بالغرفة … ثم تبدأ بسماع التهاني والزغاريد …و القبلات الحارّة على اختيارك وبيقولولك روح يا ابني الله يوفقك و امك بتصير تدعيلك واخوانك مبسوطينلك…وبغنّولك
بس المشكلة انه هيك انت بيكون بمخيلتك …..بس مش هيك اللي بيصير بالمرة….
هوه بيحوم الصمت بالغرفة …بس بعديها بتلاقي ملامح ابوك تغيرت …و بيبلش يسب عليك مسبات بتوزعها على ولاد الجيران كلهم ….وبتبلش امك تحلف أيمان ..والله لا انت ابني ولا انا بعرفك وغيره كتير…. و إخوانك بيكونوا مبسوطين عليك و انت بتتبهدل و بيصيروا يتخوتوا عليك …وبيضل هذا الوضع لحد ما اتسلم الطلب …وقتيها ايش ما حطيت رح يرضوا بالامر الواقع….
تاني مرحلة …الصيفية قبل التوجيهي و الفصل الأول
بهاي المرحلة بتحس حالك مصاب بانفلونزا الخنازير …. بكون اهلك حاطينك بحظر صحي بالغرفة تبعتك …. الطلعات بهاي المرحلة بتصير بالصدف …. اللهم من البيت للمعهد او المدرسة و العكس …بتفتقد للتلفزيون و الانترنت …. و بتصير الكتب والدوسيات و أنو استاز احسن من التاني عشان توخد عنده معهد هو هوسك الوحيد ….
بتقرب الامتحانات و بتبلش تعمل جداول و جداول للدراسة … اللي بيشوفك بيصدق انك رح تمشي عليها …و بتصير كاسات العصير و الشاي داخلة طالعة من الغرفة حتى من دون ما تطلب …حتى انه و لأول مره في حياتك بتصير تعرف انه في ثلاث وجبات باليوم فطور و غدا و عشا و بتتعرف على الكيك و الشيكولاتة و اشياء كتيرة ما كنت تعرف انها موجودة ….و حتى انك بترحب بالصوبة لأول مرة بغرفتك ..بعد ما كنت تروح عغرفة القعدة عشان تتدفى … وبتصير التدفئة شغالة 7/24 عشان راحت سيادتك… على الله تجيب هالمعدل …
طبعاً بتبلش الامتحانات و انت مش خاتم و لا مادة … وبتبلش تيجيك تلفونات بيقولولك هاي الاسئلة متوقعة وهاي كزا و هذا كزا ……….و بتبلش انت تنحت و تنحت و بتوصل الليل بالنهار عشان تخلص … و آخريتها بتروح على الامتحان مش خاتم …
و بمر امتحان ورا امتحان ورا امتحان …. وكل ما يسألوك أهلك كيف سويت يا ابني …بقولهم منيح الحمد لله حتى لو كنت مخبص إلا ازا متأكد انك مخبص رسمي بتقلهم …الله يستر ما أحملها عشان تمهد للوضع في حال حملتها ….
بتخلص الامتحانات و بيجي وقت النتائج …. في هذا الوقت بتكتشف انك مش مقطوع من شجرة وانه عيلتك أكبر بكتير مما كنت بتتصور … و بتحس انه رقم جلوسك صار كنز قومي الكل بصير بدو اياه …و يوم النتائج بتفتح عيونك على صوت جرس باب البيت من كتر ما رن … ولما تطلع من غرفتك بتحس حالك بعزا الكل قاعد يدعي و يقرأ قرآن …بس بنفس الوقت بتحس حالك بعرس من كتر الولاد الصغار و صوت ولاد خالك وهمه بضحكوا ..
ناجح …
بتبلش الزغاريد و الطبل والزمر …وبتيجي الكنافة و الكل بوكل و بسحب حاله و بروّح …
حامل مواد …
الكل بسحب حاله و بروح … وانت بتقعد بغرفتك تتوارى عن الأنظار لمدة اسبوع ….
…………………………………
و بلا طول سيرة … خلينا ندخل بالفصل التاني على طول
طبعا ازا كنت حاملّك مادة بالفصل الأول … رح تتعرّف على أصول الكشرة الأردنية بهذا الفصل , بتلاقي امك مكشرة , أبوك مكشر , اختك , أخوك , ولاد الجيران ,حتى البواب تبع العمارة بتلاقي مكشر … يا زلمة حتى أبو محمد تبع الدكانة بتلاقي مكشر … لأ وخلي واحد فيهم يشوفك مبسوط … وتلقّى …. ولك على ايش مبسوط على خيبتك !!!… خليت سيرتنا على كل لسان ..الكل صار يحكي أحمد ابن أبو أحمد حمل مواد … بهدلتنا عل آخر هالعمر … بيحسسوك انه العائلة الكريمة كلها دكاترة و بروفيسورية … المشكلة انك بتكون كاشف البير و غطاه بس ولا بتقدر تحكي كلمة …
بكل عيلة بيكون في واحد فهمان … فممكن تلاقي أبوك اجا يقولك يا بابا.. لسا في فصل تاني ..شد حيلك … وان شاء الله ما بيضعلك تعب … فإنت بتاخد دفعه للأمام و بترجع تمارس حياتك الطبيعية …بشكل أو بآخر ….
ممممم …. الدراسة و مراحلها بتكون زي الفصل الأول…ما بتفرق كتير …
أما بالنسبة للعز اللي كنت عايش فيه الفصل الأول ففي احتمالية كبيرة انه يستمر ….. اللهم ازا حملتلك مادة رح تضطر تقوم تعمل السندويشات والعصير لحالك … و إزا حصّلتلك وجبه ونص باليوم .. بوس ايدك وجه وقفا …و مش بعيدة تقوم انت تعمل الغدا …
وقت الامتحانات بتبلش تنحت و تنحت و تنحت و ربك بيسرها …و ما باليد حيلة … بيكون الامر خارج عن ارادتك انت بتسوي اللي عليك … واللي بيجي من الله منيح …
قبل النتائج … إنت بيكون ضغطك مليون …بتلافي واحد زنخ لا بطيقك ولا بيططيقوا بيقولّك : مش تنسانا من الحلوان ….
(يا زلمة تباً لك وللحلوان تبعك … الله ياخدك … هوه لولا نقّك على راسي كان رسبت أنا…)
بس انت بتقوله … ولو يا زلمة عيب … ادعيلنا انت بس … مع انك بتكون عارف انه دعاؤه غير مستجاب و يمكن ترسب من ورا هالدعوة … بس بيكون بدك تخلص من وجهه بأي طريقة …
ما علينا …
بتطلع النتائج و بتكون ناجح و بتكيف و بتعمل عرس و بتجيب كنافة و فقيع و بتنزل انت وقرايبك تزمّروا بالسيارات و مكيفين … صحيح هوه معدلك 55
بس والله ما في أحلى من
فرحة النجاح
.
.
.
.
.
.
و فرحة الزواج و الفرحة لما تشتري بيت ولما تجيب ولاد و لما تشتري سيارة على الريموت كنترول و لما تاخد العيدية
بس ما علينا همه هيك بيقولوا انه ما في أحلى من فرحة النجاح …ههههه
وتذكر دائماً إنه في التوجيهي الك وضعك … استغله بحكمة ….هههههههه
و الله يوفق الجميع ان شاء الله و نراكم في البوست القادم ….
……………………………………………………………………………………………………….
Copyright © 2012 Bsharafak A.S.D
All Rights Reserved To Ahmad Al-Deleq
Like Us On Facebook
http://facebook.com/Bsharafak.ASD
A.S.D
BSHARAFAK 