الدعايات : هي الشيء الممتع اللي بيطلع بنص الفلم لما ينطخ البطل وييجي بدو يموت … او كل خمس دقائق ب talk shows
الدعايات علم خرافي فيه مكر ونصب و تخويت على الناس … بس في دعايات عنجد بتخللي الواحد يبلّم …
زي دعاية صحابك زي بوكسراتك منها اللي معاك من وانت صغير و منها اللي عايز يتغير …
هوه ماختلفناش صحابي بوكسرات بس بشرفك مش هيك يعني …
لأ و الا النجمة * اللي بيحطوها جنب كل جملة … عشان المصداقية قال … هههه بس تحدي تقدر تقرأ شو المكتوب … بدك عدسة مكبرة , و بدك سرعة بديهة خرافيّه عشان تجيب هاي الجملة اللي بتطلع و بتختفي ب أبو ثانيتين … ايش يعني بدكم أقرأها والا لأ .. مش فاهم أنا
هوه والله أعلم إنه ما بيكونوا بدهم إيّانا نقرأها لإنوا بيكون فيها نفي للدعاية كلها .
مثلاً:
دعاية لشامبو :
بتلاقي طول الدعاية بيقولّك : جربيه ولاحظي التغيير من أول استعمال
عند النجمة* : النتائج لا تظهر الا بعد الاستعمال المنتظم ..
ايش بالزبط استعملوا والا لأ … والا بتقوللي إزا ما زبط عشعرك ضلّك متخورف واشتريه كمان مرتين تلاتة … لإنوا أنا حاتطلك شعر رونالدو و شارابوفا بالدعاية ..
و أكيد شارابوفا و رونالدو ما بيستعملوا …
يا زلمة و شرفي الشامبو تبعك غير صالح للاستخدام البشري … يا زلمة حتى لونه مُصمط ما فيّه أي نوع من الحياة
و أكيد ما بحكي عن كلير …. هههه
سيبونا من الشامبو ..
و ندخل على الكريمات :
بالدعاية : لاحظي تحسن لون البشرة بعد أول أسبوع
عند النجمة *: جُرّب على شلة نسوان بالمختبر وزبط على تنتين ..
عند النجمة التانية* : للحصول على أحسن النتائج يجب عدم التعرض لأشعة الشمس , أو ضوء القمر و حذاري من ضوء اللمبه .. و انتبهي من الاقتراب من ضوء الشمعة …
طيب بالنسبة للتنتين اللي زبط معهم كانوا مومياء اشي …
لأ وكله كوم و اللزقات اللي بتشفي من كل الأمراض كوم تاني :
الحلو بالموضوع انه ما في نجوم بهاي الدعايات .. يعني المصداقية تبعتهم بتنقّط ..
بيقولّك:
اللاصقة السحرية
لاصقة القضاء علي السموم
تعمل اللاصقة على العلاج والوقاية من الأمراض التالية
الصداع الشديد , التوتّر ,ارتفاع ضغط الدم , ضغط الدم السّكري , الجلطة , والذبحة الصدريّة , و الأورام السرطانيّة و امراض الكلى , و التهاب المفاصل و الروماتيزم , والاكتئاب والتوتر , و تجلط الدم , و و و …
بس إنّي أقدر أعرف الرابط العجيب بين هادي الأمراض مش قادر …
بس بيني و بينكم همّه بيقولوا “بأمر الله” … فأنا أتوقّع إنه هادي نوع من النجوم اللّي بتنحكا حكي … يعني إزا ما زبطت معك بيكون الله مش كاتب انها تزبط …
بس بعد التفكير العميق لقيت رابط عجيب ..
بتلاقي كتير من هالأمراض عند ستّك أو سيدك …
فلمّا يشوفوا الدعاية هات فهّمهم انه تخويت و ما في منّه هاد الحكي …
هههه …
ما علينا و قبل ما أختم بحب أحكيلكم انوا
90% من الأطبّاء ينصحون باسخدام صابونة بشرفك , و ذلك لقضائها على 99.9% من الجراثيم و البكتيريا المضرّة بالصحّة ….
* للحصول على أفضل النتائج , يرجى استعمالها بالتزامن مع صابونة ديتول
ههههههههههههههههههههههههه
…………………………………………………………………………
رايكم يهمّنا فلا تبخلوا علينا بكومنت ,لايك , شير
Copyright © 2012 Bsharafak
All Rights Reserved To Ahmad Al-Deleq
Like Us On Facebook
و هي دعاية اللزقة السحريّة للّي ما بعرفها