يعرف الوطن بانه هو عبارة عن المكان الذي يرتبط به الشعب ارتباطا تاريخيا طويلا, و المنطقة التي ولدت فيها الهوية الوطنية للشعب.
و أول ما تجيب سيرة الوطن قدام اي شخص, أول ما يخطر بباله هوه وين انولد, شو جنسيته, أو أهله أصلهم من وين, بربط المصطلح ع طول بالمنطقة الجغرافية اللي ينتمي الها.
بس الوطن معناه يتعدى هاد الشي, وبدك وقت ل تعرف شو هوه وطنك, بس أول ما تلاقيه حتعرف انه هاد وطنك.
الوطن من وجهة نظري هوه المكان اللي بيحس فيه الشخص بالأمان, المكان اللي بيحس انه بينتمي اله, اللي بيحس فيه انه مالك كل شي حتى لو ماكانت حيلته قرش.
الوطن هوه شخص بتحس معاه بالحنين و الأمان, هوه بيت صغير دافى أول ما تدخله تلاقي بنت صغيرة زي القمر ماسكة برجلك و بتتشعبط عليك, الوطن هوه صاحب الك 5 دقايق معاه تنسيك هموم الدنيا كلها, صاحب بخاف عليك ومهما صار مخلي عليك.
الوطن هوه زوجة, تنسا تعبك بين ايديها, تنسا يوم شغل طويل أول ما تلاقيها قاعدة تستناك, مش عارفة تنام قبل ما تطمن عليك, هيه أم, سهرت ليالي جنبك وانت مريض, أم عاشت حياتها عشان تشوفك مرتاح, عاشت حياتها عشان تشوفك أحسن الناس.
الوطن أب, ترجعله بمشاكلك وتعرف انه بده مصلحتك بأي جواب حيعطيك اياه, أب مهما زادت همومه عمره ما رح يحسسك فيها وبخليك بمعزل عنها, أب عاش حياته عشان ما يحرمك من شي, أب علمك الحياة عشان ما تتفاجئ فيها.
الوطن أكبر من انه يرتبط بمنطقة جغرافية وجنسية, الوطن هوه حالة من الراحة النفسية, حالة من الطمأنينة, حالة من الاستقرار النفسي, حالة من الاكتفاء والرضى, حالة بيحتاجها كل شخص عشان يكون مبسوط بحياته.
دور على وطنك وما تنساش تكونله وطنه.
بس هيك 
دمتم سالمين.
BSHARAFAK 
مش شايف انو هاي انانية عظمى؟!
مكان ترتاح فيه، ام او اب او زوجة بيدوروا على راحتك انت؟!
طب والي بوطنه بس لا مرتاح ولا متزوج او اهلو مش موجودين شو بيكون؟! لا منتمي؟!!
انا مش بصدد ابيعك وطنية كذابة، بس بلادنا كلها مافيها وطن لو بدنا نعرفها هيك -عالاقل بنظري-
بتهيألي الوطن هو الكاسة كاملة : النص الفاضي والمص المليان سوا!! يعني نفس الزوجة الي بتلاقيك عشان تعتني فيك وكمان عشان تزن فوق راسك تغيرو برادي الصالون!! نفس الام الي بدها تشوفك باعلى المراتب وبرضو بتضل تلحنلك اولاد عمك عملوا وولاد خالك معملوش،، نفس الاب الي قدامك مابعجبو العجب بس قدام الناس شايف حالو فيك 🙂 🙂
نفس الاحساس الي بنتابك وانت مزروع بهالبلد وقرفان غربتك والي بيصير فيها، بس لما تكون بعمان وتيجي اغنية بشرة خير تضحك من جواك وتحن ♡
لوكان الوطن مقتصر على راحتك ماكنا بحياتنا سمعنا عن غاندي، تشي جيفارا، جميلة بوحيرد ولا احمد يس!
الوطن هو الحب الحقيقي الي قد مابتتغلب فيه وبتتعذب بسببو مابتعرف انت ليش متمسك فيه ولا بتقدر تسيبو او ماتفكر فيه. لما تطلع برا دويرتك وتقول انا بدي اعمل عشان هالوطن مش عشان هو يعملي ويقدملي هون بتحقق الانتماء الحقيقي.
فكرك بيجي يوم نفكر هيك؟! انا شخصانيا حاسة صعب كتير