مبارح اركبت مع شوفير تكسي مهسهس رسمي …
وما حد يسألني شو معنا مهسهس لإنّي ما بعرف … بس رح تحس بمعنى الهسهسة لما تكمّل القصّة …هههه
” وللعلم أنا بمصر حاليّا فسوّاق التكسي مصري و بحكي مصري “
ما علينا ….المهم ..
كنت رايح عند شب و معي شويّت أكل للغدا …
فوقّفت هالتكسي و قلتلّه وين بدّي أروح …
فأوّل ما اركبت بلّش يشمشم و يطلّع صوت من مناخيره من شدّة قوّت الشّفط عنده …
“بتعرفوا كيف لما الحصان يستنشق هوا و يطلّع صوت بماناخيره .. نفس الوضع ..و هاد أقرب وصف للصوت اللي كان طالع منّه …هههه”
هلّأ, الأكل اللي معي محطوط بعلبتين ف بعد 5 ثواني من التحرّك وقعت منّي علبة بس الحمدالله كانت جوّا الكيس و مسكّرة منيح … فما صارلها اشي
فبلاقيه بيقولّي اوعا الشوربة … ههههه
و من وقتها عرفت انّي ركبت مع التكسي الغلط …
أنا : لا الحمد الله ما صار شي
الشوفير : الحمد الله , هوّه ايه دا …
أنا : هديّة ..
الشوفير : ريحتو حلوة الرز ..
”راحت على الشب ,, رح يتسمّم “
أنا : الله يخلّيك …
الشوفير : هوّه رز و لحمة اللي في العلبة
“طبعا وكل ثانية يمد راسو جوّا الكيس بدّو يشوف شو موجود جوّا الكيس “
أنا : رز و جاج … و فراخ يعني
الشوفير : ريحتو حلوة أوي
“ وهون تعدّينا مرحلت التسمم و صرت أدعي للشب الله يطوّل بعمره و ما يموت بعد هالأكلة “
أنا : آه
الشوفير : ما خده لمين دا
“ و انتا مالك ما خده لمين يا زلمة و صّلني و انتا ساكت , مش ناقصني حدا يتسلّا فيّي بهالشوب “
أنا : و الله ماخده ل شب صاحبي
الشوفير : بتعرف انّه دي أحلا هدايا , تاخدها للمزّة بتعتك و تاكل انتا و ايياها
“ بالزبط , بدي آخد لبنت رز وجاج و نفرد هالحصيرة على باب سكن الطالبات و نسلخ صاروخين بيبسي مع شويّة مخلّل و طرشي , يا سلاااااااااام و ضع رومنسي من الآخر “
أنا : لا و الله لشب صاحبي الحمد الله ما عندي مزّة
الشوفير : يعني انت شب محترم
أنا : آه شايف
الشوفير : لا مهوة مش كل شب معندهوش مزّة بيكون محترم , و مش كل شب عنده مزّة معناتو مش محترم , ما بينفعش اقولّك السلبيّات بس ..و و و هاااا … عارف الزاي انتا
“ كإنّوا سب عَلَي بالعقل “
أنا : مزبوط
الشوفير : خلّيني اتّصل بالمزّة بتعتي من الصبح و هيّة قافلة موبيلها
“ حل عنّي بشرفك “
و طال هالتلفون و ضرب على رقم و حط Loud Speaker
التلفون : الهاتف المتنقّل المطلوب مغلق أو غير متاح يمكنك ارسال رسالة صوتية ……
”المفروض أصدقك أنا يعني !!! “
الشوفير : بتِتقَل .. قطّعت قلبي حتة حتة
أنا : يلا بسيطة
الشوفير : هوه انتو بتهدو لبعض أكل و كدا … نحنا بنجيب حلو , كنافة
أنا : نحنا بنهدي حلو و كنافة و كدة …
“ ما أنا أصلا حكتلك هدية عشان تسكت , و أسكّر أي نوع من الحكي بدّوا يصير معك , بس ما شاء الله عليك بتفهمها عالطاير “
الشوفير : أكيد إنت بتحبّه لصاحبك دا , و أكيد هوّه ب بادلك نفس الشعور
“ فاهم الموضوع غلط الزلمة !! “
أنا : آه الحمد لله
الشوفير : هوّا انتا اللي طابخه و الا Delivery
“ حل عنّي بشرفك .. قززتني “
أنا : آه , أنا اللي طابخه تقريباً
”مع انّي مش أنا اللي طابخه”
الشوفير : كويّس و الله
أنا : اممم آه
الشوفير : اوبااااا
“شاف بنت حلوة سايقة سيّارة “
الشوفير : استنّي يا بت خليني اعاكسِك … دي معاها كيا سيراتو ..مش حلحقها وطريقي طريق تانية ..
بس برضه فتح الشبّاك و زت عليها كلمة غريبة
” مش هاد اللي كان يحكي عن المحترمين قبل شوي !!! “
و الا في بنت سمرة بتقطع الشارع
الشوفير : عدّي يا أسمر عدّي
الشوفير : ههههه … دي ضحكت ازاي لو قلتلها يا بيضة .. هههه
” يا زلمة عمرك 50 سنة , استحي على شيبتك “
الشوفير : انتا راجل طيّب والله .. في ناس بتركب معايا ما بصدّق و انا منزّلهم .. بس بجد انتا دخلت قلبي …
أنا : الله يخلّيك ..
الشوفير : هوه انتا من فين ؟
أنا : أردني
“ صفن 3 دقايق “
أنا : مالك صفنت ..
الشوفير : أنا حبّيت الأردن عشانك يا دكتور
“ ممممم … بالزبط … طلع عن جد فاهم الموضوع غلط “
أنا : الله يخلّيك سيدي
الشوفير : هوه انتا بتدرس ايه ؟ عشان الألقاب يعني
أنا : خلّيها من غير ألقاب أحسن ..
الشوفير : لا بجد .. هندسة و الا طب
أنا : طب ..
الشوفير : طِب بشري و الا أسنان … عشان لو بشري حقولّك يا دكتور بشري .. و لو أسنان حقولّك يا دكتور أسنان ..
أنا : ممممممم …. لا و الله بشري
الشوفير : بس عايز أديك “ أعطيك “ نصيحة …
أنا : آه , تفضّل
الشوفير : ما تتجوّزش دكتورة … خدلك مهندسة أو حاجة
أنا : ليش يعني …
الشوفير : تووووووووووووووووووووووووووووووووووووووت تووووووووووووووووووووووووووووت تووووووووووووووووووووووووووووووت تووووووووووووووووووووووووووووووت تيت تيت تيت
ولو زعلت الدكتورة ح طوووووووووووووووط تييييييييت ….نياهاهاها
أما المهندسة لو عصّبت بترميك بالمثلّث ب المسطرة حرف T بس مش أكتر … ههههههه
أنا : مممم
الشوفير : لا بجد .. انتا حاطت ببالك انك تاخد دكتورة …
أنا : لسّا مش حاطط ببالي شي ..بس خلص رح آخد بنصيحتك
“ و في هادي اللحظة قرّرت أرد على التخويت تبعه .. خلّينا نتسلّا شوي ..ههه ..بس للأسف قرّبنا نوصل”
الشوفير : بجد و الله … أصلِ ممكن تقول ده شوفير تكسي و و
أنا : لا يا زلمة عيب هاد الكلام .. كل النّاس خير وبركة … كتّر خيرك
الشوفير : الله يخلّيك … هوة في ناس ممكن يستقِلّوا بالنصيحة و يقولوا انّه شوفير التكسي … بس بعدين بيتزكّروا انّه شوفير التكسي كلامه صح
“ بالزبط … خذوا الحكمة من أفواه المجانين “
أنا : آه و الله … بس جد رح آخد بنصيحتك .. أقنعتني صراحة
أنا : خلص على جنب … يعطيك العافية
الشوفير : بجد والله ..
” لا بموّه قاعد ..تبّاً لك .. يخرب بيت الغباء “
أنا :آه جد … يعطيك العافية
الشوفير : ماشي , المرّة الجاي ابقا اتّصل فيّيا .. خلّينا نفرش بالعربيّة و ناكل …ههههه
أنا : هههه… آه أكيد ….تصدّق حبيتك عن جد يا رجل هههه …هات أعطيني رقمك خلّيني أسجله عندي
” هون أنا خلّيته عنجد يفهم الموضوع غلط .. ههههه“
الشوفير : بجد و الله …
أنا : اه يا زلمة جد .. هات أعطيني رقمك …هههه مالَك ههههه
الشوفير : ********011
أنا : آه خلص هيني أخدته , و رح أتّصل فيك ان شاء الله ,
تفضّل الحساب ..
الشوفير : خلّي يا باشا
أنا: الله يخلّيك , مع السلامة سيدي
” الله ياخدك يا زلمة , تباً لوجهك …“
و بالنسبة للشب فحالته الصحيّة الحمد الله منيحة لحد هلّأ ..و الله يستر
مع إنّي نصحته … انّه يسمّي قبل ما يا كل .. و قلتلّه انّو ازا في مجال يجيب القرآن و يقعد يقرأ على الأكل قبل ما ياكل ما يقصّر … لانّه على وجه امتحانات و مش ناقصه تسمّم ههههه
و لمّا روّحت , اركبت ميكروباص “ باص صغير “ و ريّحت راسي …. ههههه
ان شاء الله يكون ال Post عجبكم و يا ريت تتكرّموا علينا بلايك , كومنت , شير , أي شي ..
و بنشوفكم عخير ب Post تاني
Copyright © 2012
All Rights Reserved To Ahmad Al-Deleq
BSHARAFAK 
ههههههههههههههه لا بجد تكسي من الاخر…. تعيش و تركب مع غيره:)
ههههههههه … 😛
Hahahahahaha..Liked it :]
thnxxxx .. Happy to hear that 🙂
Bien Venu en Egypte mon ami 😀
ba3ed el 2este3aneh b google translate …mar7abtain ..thnxx 😀 hhhhh
ههههه! تحشيش جد 😛
حبيتها كتير 😀
thnxxx ..glad u like it 🙂
رائعة جدا , بس بدي افهم كيف استحملتة…….
عراسي جعبري 🙂 …
استحملته خوف على الأكل مش أكتر …ههههه
هههههههههههههه عنجد انا لو مكانك مش رح ادخل مصر تاني ولا حركب تاكسي <<
هههههه ,بس المشكلة اني بدرس بمصر ,ف لا مهرب من استخدام التكاسي المصرية 😛
هههههههههههههههههههههههههههههههههههههههههههههههههههههههههههههههههههههه يا زلمة ..شو ها الصبر ما شاء الله,,